- 7 -
اكتشفنا ان وجود ماما آمنة معانا كان يحسسنا بالأمان واحنا ماندري ..
من توفت الله يرحمها واحنا انحس ان البيت موحش ماله صوت ..
صرنا نقفل الباب الداخلي و الباب الخارجي قبل لا ننام ..
وجودها كان مطمّن قلبنا كنت كل ما اقوم من النوم اشوفها ..
عالريوق عالغدى عالعشى .. حتى على قعدة التلفزيون ..
كل يوم كنت اشوفها .. فجأة صار مكانها فاضي .. سريرها فاضي ..
فعلا احساس يعور القلب .. ربي يرحمها برحمته ان شاءالله
مر على وفاتها 3 اشهر .. وصرنا بعطلة الصيف .. وانا للحين مو قادرة اتقبل انها
راحت وماراح ترجع كل يوم قبل لا انام اتذكر سوالفها ضحكتها طيبة قلبها واقعد
ابجي من غير صوت لين يهدني التعب وانام .. هجرت غرفتي و صرت انام على
سريرها اللي بالصالة .. وامي ماتقدر تخليني بروحي تحت فصارت تنام عالارض
نفس المكان اللي تنام فيه يوم ماكانت يدتي موجودة
زيارة خوالي لنا قـَلـّت صارت مو نفس قبل .. يعني خالي أحمد يمر علينا بالشهر مره ..
و خالي فهد يمر علينا كل خميس بس مايطول يقعد ساعه بالكثير و يخلي شيخه
وشيماء عندنا و يمشي .. مالومهم قلتلكم البيت من غيرها موووحش .. ظلمة
- بيوم كان زايرنا خالي فهد -
فهد : سعاد انا اقول تعيشون عندي احسن
سعاد : لا يا خوي .. انا ارتاح اهني اكثر مع بناتي
فهد : ليش عاد .. والله احسلي ولكم عالاقل تكونون يمي .. يا سعاد فكري بالبنات ..
شوفي حالتهم !! فجر صايره هيكل عظمي .. و فاطمة كانت شوي وتسقط لولا انهم
ارفعوا نسبتها عشان ظروفها .. يعني عاجبج حالهم جذي!! لازم تطلعون من
هالبيت كل مكان فيه يذكرهم بالمرحومة
سعاد : ( انزلت ادموعها جان تمسحهم ) خلاص فهد واللي يعافيك مابي اتكلم بهالموضوع
فهد : على راحتج .. يللا انا استأذن
سعاد : الله معاك
---
- بالليل عالساعه 12 ونص كنت منسدحه على سرير يدتي ( الله يرحمها ) احاول انام ..
بس طبعا ماقدر انام بسرعة لأني من انسدح اهني اقعد افكر فيها و ابجي ..
كنت ابجي من غير صوت و انا منسدحه على جنب و ويهي عالطوفه .. حسيت
ان احد يا قعد عالسرير وراي و حط ايده على جتفي .. هذي امي كل ماتشوفنا
جذي انا وفطوم اتيي اتواسينا .. لفيت ويهي ابي ألمها و ابجي على صدرها ..
بس ماكان وراي احد !!!! كنت بروحي .. والله العظيم حسيت ان في احد قعد وراي
وحط ايده على جتفي .. معقولة اتخيل ؟؟ ولا معقوله يكون!!!!!!!! لا ..
يارب يكون اللي في بالي غلط
قمت من السرير و بسرعة طلعت من الصالة
فجر : يمااا ؟؟ يمااا ؟؟
سعاد : ( توها طالعه من الحمام ) ها يمه اشفيج ؟
فجر : ( ارتبكت ) لا مافيني شي بس كنت ادورج
سعاد : ( ابتسمت ) تبون نلعب جنجفه ؟
فجر : ( كنت ابي اسوي أي شي عشان ما افكر باللي حسيته توه ) اي .. خل اروح انادي فطوم
- اي نسيت اقولكم صرنا نلعب جنجفه وايد يمكن عشان نلهي نفسنا بأي شي قبل لا ننام -
( يت فاطمة و قعدنا نلعب انا واهي وامي .. كنا نضحك وقت اللعب .. بس هالضحك مو من قلبنا )
سعاد : انا تعبت .. ودخت
فجر : ( لميت الأوراق ) اي طبعا بتقولين تعبت لأنج خسرانه
سعاد : ( تضحك ) اي صح .. يمه فطوم ليش ماتنامين معانا اهني
فاطمة : ( طالعت سرير يدتي ) لا مابي بنام فوق احسن
سعاد : على راحتج بس سكري الليت معاج وانتي طالعه
فاطمة : اوكي .. ( طفـّت الليتات و اصعدت فوق )
---
- بهاليوم انسدحت على سرير يدتي و انا خايفه كل شوي كنت اتقلب ماقدرت انام عدل كنت خايفه وايد .. نزلت عالأرض و انسدحت عند امي -
سعاد : ( بطلت عينها ) فجر؟؟ اشفيج
فجر : مافيني شي بس ودي انام عندج
سعاد : ( لمتني و غمضت عينها ) زين بس لا تسولفين نامي
فجر : ان شاءالله ..
( غمضت عيني و انا لازقه بأمي .. قعدت اطرد الافكار اللي تخوف من راسي .. لين نمت )
- بعد جم ساعة حسيت بشي يقولي قوومي فجر .. قومي شوفي شنو يمج ..
فتحت عيني ولا اشوف منظر لليوم احمد ربي ان قلبي وقتها ماوقف ..
شفت واحد قاعد القرفصاء ( جنه بحمام عربي ) لابس بنطرون اسود وبلوزه سودة ..
و مغطي ويهه بكاب اسود مثل اللي يلبسونهم وقت البرْد .. كان قريب مني حيل
و قاعد مثني جسمه علي ويطالعني .. مد ايده بيمسكني ..
و انا من الخوف ماقدرت اصرّخ بس مسكت امي حييييل .. لدرجة خليتها اتقوم من العوار -
سعاد : ( افتحت عينها و شافته مثل ما انا شفته .. جان تلمني و تقعد تصارخ )
هيييي انت منووو واشتبيييي .. سووووماااا سووووماااا
- من شاف امي اقعدت تصرخ قام و طلع بسرعة من الصالة ..
سوما قامت على صراخ امي و انزلت تحت .. و امي قالتلها عن اللي شفناه ..
راحت سوما تشوف البيبان لقتهم كلهم مقفولين مثل ماكانو قبل لا ننام ..
كل باب ممكن يدخّل عالبيت .. كان مقفول .. عيل هالريّال لو كان حرامي
اشلون قدر يدش ؟؟ .. انا بعد هالمنظر كنت بحالة صدمة ما اتكلم -
سعاد : ( ماسكه ايدي ) يمه فجر ماصار شي لا تخافين الحين ادق على
خالج و يشوفه وين راح .. فجر يمه كلميني الله يخليج
( بس انا كنت ساكته ما اتكلم )
سعاد : ( لمتني ) لا تخافين الحمدلله راح
فاطمة : ( يت يم امي ) يمه انا خايفه
سعاد : ( لمت فاطمة ) لا تخافون امكم معاكم
- بعد ما تطمنت علينا .. دقت على خالي فهد وصل عندنا بعد نص ساعه -
فهد : باق شي من البيت ؟
سعاد : لأ بس كان قاعد على راسنا واحنا نايمين
فهد : ( بعصبية ) قلتلكم مالكم قعدة اهني بروحكم يللا الحين قومو معاي
سعاد : وين نروح معاك
فهد : وين بعد ؟ طبعا بيتي
سعاد : يا فهد قلتلك ماقدر .. بيتكم صغير و فيه ام ساره مرتك و خدامتها .. يعني يللا مكفيكم
فهد : مو مشكلة تعالو لين نطلع بيت اوسع
سعاد : لا مابي
فهد : زين روحو عند احمد
سعاد : احمد ساكن بشقة فيها اهو و مرته وعياله .. تبيني اروح ازاحمهم من صجك انت ؟؟
فهد : ( بعصبية ) اوووو اشفيج انتي .. يعني داش عليكم حرامي
وزين ماذبحكم و هم ماخذج الكبرياء للحين !!
- طبعا خالي مقتنع ان اللي كان اهني مجرد حرامي ( بَشـَر ) مادري اشلون
اذا اهو بنفسه دوره و مالقاه بالبيت و البيبان كلها كانت مقفوله!! -
فاطمة : ( بصوت يرجف ) خالي انا بيي معاك
سعاد : لا
فاطمة : خلاص يمه انا مابي اقعد اهني والله كرهت هالبيت من توفت
ماما آمنة و انا كارهه العيشه فيه
سعاد : ( تضايقت من كلام فاطمة ) خلاص روحي .. و ديري بالج على نفسج
فاطمة : ( لمت امي و اهي تبجي ) آسفه يمه بس ماقدر اقعد اهني
سعاد : ( باستها ) كل يوم تعالي شوفيني
فاطمة : ان شاءالله
- راحت فاطمة مع خالي .. يمكن اريح لها انها تعيش اهناك .. بقينا بس انا
وامي و سوما بهالبيت .. انا ادري ليش امي رافضه تروح عند اخوانها ..
امي ماتبي تحس انها عالة عليهم .. طول عمرها معززه مكرمة عندها بيتها الخاص ..
بس بعد وفاة يدتي كل شي تغير -
- من هاليوم صرت دايما احطلي فراش يم امي و انام ..
و ردتلي الكوابيس مره ثانيه .. لدرجة اني صرت أصرّخ و
أفز من نومي و القى نفسي مبللة الفراش !! -
سعاد : ( بصوت مليان حزن ) عادي يمه .. عادي ميخالف
فجر : ( اطالع فراشي المبلل و عيوني تغورق ) ليييش يصيرلي كل هذا ..
ياربي خلااص والله تعبت
( قعدت ابجي و اشاهق و امي تلمني و تقرى علي )
- ثاني يوم يت عندنا ام خلف و امي قالت لها كل شي صار -
ام خلف : لازم تاخذينها عند شيخ دين .. عالأقل خل يشوف شنو فيها يمكن عين حايشتها خل تروح ماتخسر شي
سعاد : مادري اشفيها هالبنت رافضه هالفكرة نهائيا
ام خلف : زين انا اييبلج ماي مقري خليها تشرب منه كل يوم
سعاد : مشكوره بعد قلبي والله ماقصرتي
ام خلف : اشدعوه سعاد احنا خوات
سعاد : اي والله انتي اختي اللي ما اولدتها امي
ام خلف : زين عيل وين الجاي ؟
سعاد : وي فشلة شغلتج بمشاكلي ونسيت اضَيْفج
ام خلف : ( تضحك ) عادي وانا اختج
---
- بعد جم يوم ام خلف يابت حق امي الماي المقري .. و عطتنياه عشان اشربه -
ام خلف : تعالي فجر
فجر : ( رحت قعدت يمها ) هلا خالتي
ام خلف : شربي هالماي
فجر : ( طالعت امي ) ليش ؟
سعاد : ميخالف يمه شربي
فجر : شنو فيه ؟
ام خلف : كلام الله سبحانه .. شربيه و راح تتحسنين ان شاءالله
فجر : ( هزيت راسي ) لا مابي
ام خلف : ليش عاد ؟
فجر : بس مابي
سعاد : شربي يا بعد عمري عشان خاطري
( خذيت الماي من خالتي ام خلف و ايدي ترجف .. شربت شربه و رديته لها )
فجر : شربت
ام خلف : شربيه كله
سعاد : يللا فجر .. مو انتي تبين تصيرين احسن ؟
( خذيته و قعدت اشرب يوم وصلت لي نص البطل حسيت بألم قوي بمعدتي ماقدرت
اتحمل قطيت البطل و قعدت ارجّع كل اللي شربته .. امي حطتلي زبالة - عزكم الله -
و قعدت ارجّع فيها و ابجي .. لأن الألم كان مثل السجاجين اللي تقطع احشائي )
سعاد : ( تمسح على شعري و انا أرجّع ) اسم الله عليج الرحمن
ام خلف : ( اتطالعني و بعينها خوف ) ماتشوفين شر ان شاءالله
- بعد ما هديت خذتني امي الحمام و غسلت ويهي و افرشتلي يمها و لحفتني
عشان ارتاح و انام شوي -
ام خلف : ( بصوت واطي ) البنت يبيلها شيخ
سعاد : يعني شنو ممكن يكون فيها ؟
ام خلف : يمكن عين .. او شي ثاني مادري المهم يبيلها شيخ قبل لا تسوء حالتها اكثر
سعاد : بس اهي مو راضيه
ام خلف : خلي اخوانج ياخذونها غصب
- كان صوتهم واطي بس انا سمعت كل شي قالوه .. لفيت ويهي عليهم -
فجر : ( بعصبيه ) مو كيفكم والله محد راح ياخذني غصب .. اذبح عمري قبل لا تاخذوني غصب
سعاد : ( انصدمت ) يمه فجر ليش اتقولين جذي ؟ احنا نبي نساعدج
فجر : محد له شغل فيني انا مابي ارووح .. مااابي ارووح
- اسكتت امي عني و خلتني على راحتي .. قلتلكم من قبل انا عنيدة بشكل مو طبيعي ..
يمكن تستغربون ليش مابي اروح عند شيخ ؟؟ .. ماراح اقدر اجاوب على
هالشي لأن انا نفسي ماكنت ادري ليش .. بس اللي اعرفه اني مابي اروح ..
و كل ما اييبون طاري هالشي اخاف و أرفضه بشكل قطعي -
- بعد هاليوم امي صارت تحط ماي مقري بالبرّاده عشان لا احس بشي ..
لأني كنت رافضه اشرب مره ثانيه بعد اللي صارلي .. و نفس الشي كنت
كل ما اشرب الماي أرَجْعه -
فجر : ( ماسكه معدتي و اصرّخ على امي ) انتي اشاحطلي بالماي ؟؟
سعاد : مو حاطه شي
فجر : ( بعصبيه ) بلى .. عيل ليش كل ما اشربه احس بنفس الألم اللي كنت
احسه يوم شربت الماي اللي يابته ام خلف ؟؟؟
سعاد : يمه انتي مريضه .. امشي اوديج الطبيب
فجر : ( قعدت اصرّخ ) مابي اروح معاج مكان و مابي اشرب من هالماي
خلووني بحااالي خلاااص تعبت
- امي خافت علي لأني بديت اضعف و ما آكل .. ردت الماي العادي و شالت
الماي المقري .. يانا ارمضان مره ثانيه .. و هذا اول ارمضان يمر علينا
من غير وجود يدتي الله يرحمها .. استغفرالله بس ماحبيت هالشهر من غيرها ..
كان طعمه كئيب و السفره من غير يدتي ماتسوى شي -
- بهالشهر يو عندنا و فاطمة و شيخه و شيماء .. صارو ينامون اهني ..
ومثل الحال برمضان اللي قبله .. صحتي تحسنت وايد .. و ماصار لي أي شي موزين الحمدلله -
- خلص ارمضان و يانا العيد و كان من غير ماما آمنة عيد باهت مافي أي حياة ..
بعدها ردتلي الكوابيس ورد لي الياثوم مره ثانيه .. و كل ما يحاولون فيني
كنت أرفض و اصارخ و ما ارضى اني اروح عند شيخ يقرا علي -
- صرنا بسنة 2007 .. بهالسنة مديت ايدي على امي .. يارب اغفرلي هالذنب ..
و عساني اموت قبل لا اسويها مره ثانيه -