اتصل بادارة الموقع البحث   التسجيل الرئيسية

 


العودة   منتديات عاصمة الربيع > القسم الادبي > مشــــاعر الــــروح > القصائد المنقولة والمسموعة

القصائد المنقولة والمسموعة خاص بالقصائد المنقولة والمسموعة والتي اعجبت ناقلها

إضافة رد
 
أدوات الموضوع انواع عرض الموضوع
قديم 03-03-14, 01:24 PM   رقم المشاركة : 1
ولد تميمي
عضو فعال
الملف الشخصي






 
الحالة
ولد تميمي غير متواجد حالياً

 


 

الشاعر ابو فريد بن شريده التميمي والشاعر بدر الحويفي


________________________________________
بسم الله الرحمن الرحيم
هذه القصيده من الشاعر ابو فريد خالدبن شريده التميمي قالها حين انتهاء رخصة القنص وبداية موسم الصيف وطول الانتضار وهو يسندها الى الشاعر بدر بن عواد الحويفي ابو سلمان وهو غني عن التعريف ,,,
ياراكب اللي ماقفه بالصداره تاكي وراكي مابغى شغل تجديد
عند الوكاله ركبو له غماره واعطو ضمانه عقب فحص وتجديد
يمشي مع السواق حسب الاشاره جديد توه ماعرض له تكاديد
يلفي لبيت فايح به ابهاره صوت النجر توحيه وانته من ابعيد
يلفي بدر بدر الوفاء والشطاره يهدي سلامي للحويفي بتحديد
سلام احلى من حليب البكاره تحية فيها تراحيب وازيد
خص الحويفي واوصله في دياره رجل صدوق وافي بالمواعيد
حق علينا لازم له زياره حيثه فهيم ويعتني بالاجاويد
يفرح بضيفه ويتوصى بجاره مدهل رجاجيل نشاما واواليد
رجل قديم وباهس بالصقاره ياطالب رايه ترى رايه ايفيد
القيض جانا يطرد البرد ناره واشلون ابصبر يالحويفي عن الصيد
الطير انا احبه بشوق وحراره حب الولع بالقلب ساكن تقل حيد
لاصار حر ماكره بالنداره من فوق شاهوق ودربه جلاميد
حرعريض بالمواري اوساره صيروم عنهن ماتحمى ولايبيد
اليانضرجول الحباري وداره لامن شلع ياخوك خطر على الايد
تسع شهور يالحويفي مراره حنا نقزرهن حساب وتعاديد
والطير بالمربط يشوف الحساره لاشاف زولي ينتخيبي وانا احيد
كنه يابوسلمان تذرف عباره يشكي البطا يبي الخلاء من غثى القيد
ياشين حجر الطير وسط العماره سجين ضلم والقهرجاه تشديد
فكره معي ماغير يرقب نهاره وان شفت زوله لذة عنه بتصاديد
ياليت نايف يوم يصدر قراره خلا ثلاثتهن لنا رابع عيد
كودانها بالقلب تطفي الشراره تسقط حساب وينقص ايام تسديد
الخط جاك وكان عدا مساره فالله يرد اللي تعدا الامواريد
وصلو عدد ماصوتو بالمناره وعداد مارفعة بيوت بعواميد
على النبي راع النقى والطهاره اعداد ماغرد من الطير تغريد

رد الشاعر / بدر بن عواد الحويفي ابو سلمان
يامرحبا اعداد ماسارساير يابوفريد اهلا وسهلا وترحيب
اهلا هلا اعدادوبل النداير غر المزون الي مطرهن سواكيب
برسالة الطيب نسوق البشاير ونجاوب الصاحب بكل الاساليب
لازارنا من يم الأصحاب زاير نبذل جهدنا بحترام الاصاحيب
ماعن جوابه لو وصلنا عذاير لوكان انا معطي عن الشعر تجنيب
الشعرمالي في مجاله حضاير من يوم وادعت الصبا واقبل الشيب
صكيت عن سوقه جميع الدواير جايز ولالي في مجاله مقاضيب
ماقصدي عاجز ولاني بناير عنه متقاعد واعتنوبه لواعيب
حقي خذيته مابقى لي ذخاير خضت البحور وذقت منهامشاريب
واليوم عن بدع المعاني مخاير وخليتها لمصخرين الهناديب
لاكان خالد يوم باح السراير وسند علي ابيات شعرن مساحيب
ابقنعه ببيات مامن خساير فيهن من الواقع حقايق وترتيب
يابن شريده كل ماقلت صاير والطير وقت القيض في حال تعذيب
سجين بالمربط يتل المراير ولوضاق ماله غير قوته مطاليب
مهما كفخ ماهو عن الوكر طاير خمسين سانتي مربطه بالعراقيب
صكن عليه مشيدات العماير ويكفخ زعل لاشاف زولن مع السيب
والقيض حكمه باصقاقير جاير منته لحالك يابعيد المطاليب
متى ندرج للغشيم الكساير ونفرع الي قد فعل للهواريب
ايام ماتشكل علينا الخساير غرامنا تتطليع عكف المخاليب
الي يخلن ريش الابرق نثاير مدربات وللحباري قصاصيب
امصخرات الخرب واقع وطاير للخرب عوق وللرانب مشاعيب
في ديرتن مابه شبوك وحفاير ماكفته لينه شمالن بتغريب
لاصار بريضان نقع وبذاير بعد طلوع سهيل سبعين تقريب
قمنا نغيرللمواترتواير لمصادمت صم الحجر والضواريب
ياحلو شبت نارنا بزباير وشوف الدلال مكيفات الشواريب
والماء من فواح المعاميل فاير على حطب ماهو على قز ترتيب
يطيب كيف الي بصدره حشاير بين النشامافي مزوح وتعاجيب
هذاك ياخالد ربيع الضماير وشوف الصحاري والرياض المعاشيب
اخير من شوف البلد والحواير تقفي وتقبل للبقالات وتجيب
لوكان بلسواق بيع وتجاير البر ذعذاعه لراع الولع طيب
يالله عسى هل المسافر سفاير الي بحكمك تطلع الشمس وتغيب
خص الذي مافي سفرهم نكاير على شرف ماهو سفاهن وتخريب
الله يجير من الخطر والعثاير جميع رجالن مايماشي هل العيب
هذا جوابي يوم بحت السراير لبوفريد موجهين المكاتيب






رد مع اقتباس
إضافة رد

مواقع النشر (المفضلة)

أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع


الساعة الآن 04:35 PM


Powered by vBulletin® Copyright ©2000 - 2024, Jelsoft Enterprises Ltd.
تعريب :عاصمة الربيع

تصميم وتطوير سفن ستارز لخدمات الاستضافة والتصميم