يا خالد الجدعان نسل المشاهير @@ ياابن لغيصم جيت عندي هدية
هدية تسوى الذهب والدنانير @@ ابيات شعر اللي حروفه نقيه
عبيرها مثل النفل والنواوير @@ وقت الربيع اللي زهورة ندية
فيها شذا الريضان مع نغمة الطير @@ وازكى من الريحان بارض خليه
ينساق مثل الكيف لاجل المناعير @@ مع النسايم والهبوب العذيه
يستاهله كفو تميز عن الغير @@ بالطيب والنخوه وقو الحميه
انا اشهد انك ماتحب المعاذير @@ حاضر بحاضر ماتحب الونيه
سكرت باب الهرج بالفعل تسكير @@ ومسكت في كفك خطام المطيه
ورفعت روس اللي تسل البواتير @@ شمر وشمر ماتحب الرديه
ربعك على فعلك تزف التباشير @@ وكل رفع صوته بعد حي حيه
الطيب ماحاشه قليل المخاسير @@ ونفس تهاب الطيب تصبح دنيه
من جاء لكم يلقى الدلال المباهير @@ مساطره بالصبح والا عشيه
والعود الازرق في جديد المباخير @@ وبعد العلوم الغانمه شاذليه
مدايحك ماهي بكذب وتزوير @@ شي تشوفه بالعيون البريه
صفيت شعري مثل صف الطوابير @@ تصف قدامك وتضرب تحيه
وصخرت قاف الشعر لا شك تصخير @@ والقاف في شرواك يسهل عليه
واقبل تحيه من كتب حرف تعبير @@ تعبير واضح والحروف ابجديه
اسطر المعنى على الكيف تسطير @@ الراس يملي وكتبنه يديه
الشاعر \ محمد الحربي
العرض العادي
