قــــــــــــ(~ بوح ~ )ــــــــــــلم و محــــ(~ مجنون~)ــرة ...

[ّ~بوح مجنون~]

[align=right]السلام عليكم ورحمة الله وبركاته...

فاصلة واكمل بعدها التعقيب

لا تأسفن على غدر الزمان لطالما
ــــــــــــــــــــــــــــــــ رقصت على جثث الأسود كلاب
لا تحسبن برقصها تعلو على أسيادها
ــــــــــــــــــــــــــــــ تبقى الأسود أسودا والكلاب كلاب
تموت الأسد في الغابات جوعاً
ــــــــــــــــــــــــــــــــــــــــــــ ولحم الضأن تأكله الكلاب
وذو جهل قد ينام على حرير
ــــــــــــــــــــــــــــــــــــــــــــ وذو علم مفارشه التراب

[/align]

[تسواهن]

.
.





هلا والله




شفيك متضااايق ..!

وهالحراميه وشبلاهم ..!


الله يعينك.. انا عاانيت مثلك كثير وكثير معاهم او معاهن ..
بس شنسوووي هذي ضريبة الشهره والنجاح <<< قاطه معاااك




صدددقن لو سرقوووا كل ما تكتب بس يبقى الاصل احلى وكل شئ غيروه يبين ..



ما عليك منهم .. وحنا يكفينا وجودك هنا معانا يا الاجوووددي




واخبااار خطيبي .. ما لوه نية يحدد العرس .. ترى العمر يمشي





واخبااار حتوومي العسووول ياليت تحط لنا صورتوه اذا حلوو يمكن اغير واخذوه واخلي جدوه




وهـــبس على عايلة المزايين يا ناس







تحية تملا الارض وتعانق السماااء تقدير ومعزة لشخصك الكريم ..










.
.

[اثير]

[ّ~بوح مجنون~]

اقتباس: المشاركة الأصلية كتبت بواسطة خــ ج ــل    صراحه حبيت هالمتصفح..وحبيت اضيف بعد المرح بعد كتاباتك الاخيره اللي حسستنا انك متضايق يقولك واحد تزوج ومره من المرات صار عنده عزيمه المهم جاب لزوجته الذبيحه للبيت وقال اطبخيها الزوجه مسكينه ،، يوم شافت الذبيحه قالت: مااعرف اطبخها:O عصب زوجها وقال: طيب والله لارجعك لاهلك كيف ماتعرفين تطبخينها وشالها ووداها لاهلها وقال لابوها بنتكم ماتعرف تطبخ الذبيحه علموها ،، قال ابوها خلاص خلها عندنا شهرين نعلمها وبعدها تعال خذ زوجتك قعدت البنت عند اهلها .. وجا يوم اللقاء المنتظر دخل الزوج وقال ابوها خلاص علمناها تطبخ الذبيحه قال الزوج خلاص انا بآخذ زوجتي ونمشي قال: الابو وين رايح لازم تتأكد ان زوجتك تعرف تطبخ الذبيحة قال: طيب جاب الابو للزوج ذبيحه حيه وقاله اذبحها عشان نخلي زوجتك تطبخها قال الزوج ما اعرف اذبحX_X قال: الابو طيب روح خل اهلك ايعلمونك المراجل واذا عرفت تعال و خذ زوجتك تقبل هالمرور السريــع وفـــلها وربك يحلها..

صباحك جنة خجل
هههههههههههههه اجل مايعرف يذبح الذبيحها ويبيها تعرف تطبخ خوش

شكرا خجل على هاللمسة الحانية منك
وياليت صدورنا دائما ضيقه عشان تجين انتي اصلا وتجيبي معاك هالطرائف

حضور بهي
شكرا لك

[ّ~بوح مجنون~]

اقتباس: المشاركة الأصلية كتبت بواسطة تسواهن    . . هلا والله شفيك متضااايق ..! وهالحراميه وشبلاهم ..! الله يعينك.. انا عاانيت مثلك كثير وكثير معاهم او معاهن .. بس شنسوووي هذي ضريبة الشهره والنجاح <<< قاطه معاااك صدددقن لو سرقوووا كل ما تكتب بس يبقى الاصل احلى وكل شئ غيروه يبين .. ما عليك منهم .. وحنا يكفينا وجودك هنا معانا يا الاجوووددي واخبااار خطيبي .. ما لوه نية يحدد العرس .. ترى العمر يمشي واخبااار حتوومي العسووول ياليت تحط لنا صورتوه اذا حلوو يمكن اغير واخذوه واخلي جدوه وهـــبس على عايلة المزايين يا ناس تحية تملا الارض وتعانق السماااء تقدير ومعزة لشخصك الكريم .. . .

السلام عليكم
صباحك وردي تسواهن
وصباحك نقي بنقاء معدنك
لاعدمتك وهذا الصدق فيك
والدي بخير الا انه وجد عروس افضل..فقد اكتشفت انه لايحب الثرثرة وانتي ماشاء الله
ثرثره وهذره وازعاج وقلق ههههههههههه مزحه
بس ماله بالطيب نصيب

اما سرقة مواضيعي ومعرفي فالى الله المشتكى
اما حتومي فديته
جد شكله بياكل الجو على راكان واخوانه



شكرا لك ونبادلك المعزة واكثر

[خــ ج ــل]

اقتباس: المشاركة الأصلية كتبت بواسطة ّ~بوح مجنون~    صباحك جنة خجل هههههههههههههه اجل مايعرف يذبح الذبيحها ويبيها تعرف تطبخ خوش شكرا خجل على هاللمسة الحانية منك وياليت صدورنا دائما ضيقه عشان تجين انتي اصلا وتجيبي معاك هالطرائف حضور بهي شكرا لك

ربي يســلمك ويسمنك

وعسى ربي ماايجيب لكــ الضيــقه والكدر..

وأنــا شكلي شكلـــي بغرز هـــون<<يعني لاتتضايق من كثرة تواجدي

[محمدالجرمان]

مساء الخير ابوراكان صفحات رائعة بروعة كاتبنا الحصري

[ّ~بوح مجنون~]

[align=right]السلام عليكم ...طيب الله اماسيكم...
مسرحية جديدة وجميلة جدا ومضحكة جدا...
لكنها............................... مبكية ومبكية ومبكية...
دعوني اسرد السم في العسل (ههه) اقصد دعوني استعرض بعض السيرة الذاتية وهي ملامح بداية خيوط المسرحية
امي الحبيبة تعيش الى جواري
امي الحبيبة تملك معزات ثلاث كجد هايدي
امي الحبيبة ... متعبة جدا هذه الايام (اللهم رب الناس اذهب الباس عن امي واشفها انت الشافي لاشفاء الا شفاؤك شفاء لايغادر سقما وجميع مرضى المسلمين)
لديها تضخم بالقلب وضعف في عضلة القلب وتشكو هذه الايام من الم شديد بالكلى والقلون اللهم ياسامع الصوت اشفها..
المهم..
الاسبوع الماضي تم تنويمها ثلاثة ايام في المستشفى ... ولازال الالم ...
حملتها يوم الاحد (قبل امس)بسيارتي للرياض وعدت
تم تنويمها بالمستشفى هناك
انتهت التوطئة....
نبدأ الان بسرد معطيات ميلاد المسرحية الهزلية...
اليوم الثلاثاء تأتي العاملة المنزلية (ماودي اقول شغالة) وتقول بابا هذا غنم مافي اكل اصفر مافي اخضر من اثنين يوم...
تقول الشعير بح والبرسيم فنش
...............
يزاح الستار
مقاعد خاليه من لاجمهور...(الرقابة والمحافظة والبلدية)
اضاءات محترقه جميعها لاانور(حماية مستهلك)
حتى الممثلين لم يكونوا في اماكنهم ابدا فالممثل يقوم بدور معين ثم يعود الى حقيقته لكنهم هنا كانوا...وحوشا...

بسم الله نبدأ
بوح يربط الشماغ معه طفله الصغير فزاع للمعزات الثلاث...
افا ياذا العلم معزى امي المريضة ماعندهن علف من يومين وامي مسكينة منومة بالرياض ماتدري
ابشرن بعزكن والله لااقدم لكن بدل الكيس عشرة مفاطيح شعير وبوفيه برسيم مع تبن ولامانع من مقبلات الشوار(هذي كلها اعلاف للماشية)
اطمر ياولد على الددسن والحق الى صفاة الغنم وجب للمعزات الحبيبات مأدبة شعير وبرسيم

يمر بوح بطريق الكويت الجميل الرائع
محلات اثاث جميلة
معارض سيارات انيقه
محطات متكاملة ....
الان يقف بوح عند اشارة ضوئية سينحرف يمينا حيث ماهي الا برهة ويجيب الذيب من ذيله
ماهي الا لحظات واجلب ضالة المعزات العزيزات

الله ما اجمل منظر هذه الحافلات وهي محملة باكياس الشعير ذهبي اللون
سيارت كثيرة جدا محملة بالشعير
ولون الشعير ذهبي نقي كالذهب
سيارات كثيرة اكثر من خمسين تريله كلها مملؤه بالشعير

سمعت عن غلاء الشعير
وسمعت عن جشع التجار
وسمعت عن ندرته وسمعت وسمعت
لكن الحمد لله بما ان التريلات بهذا الكم فلا اعتقد ان هناك مشكلة
وبما ان مولاي خادم الحرمين وضع لجنة لمتابعة الاسعار فلاخوف

بسم الله ها اناذا اقف عند اول تريله
انا: السلام علاكم (بتكلم نفس لغتهم عشان مايحسبوني غشيم ويضحكون علي بالسعر)ايه هين
رجل جالس معطيني جنبه ولا التفت لي اصلا وسمعته قبل يتكلم قال اففففففف (هذي شفطة بيالة الشاهي خابرها مليانه شفطها بشفه واحده وقال: الشعير ماهو للبيع
انا: وشوله تجلبونه(نفس اللغة) دامه مو للبيع
هو: هذا بس للتجار الكبار اللي يطلبون بالالف كم تبي انت؟
انا كنت ابي خمس اكياس بس استحيت منه وقلت : ابي عشرين
قال : ماعندنا

واحط الددسن بواحد واروح للي بعده
انا: السلام علاكم
رجال معطيني جنبه الايمين (احسن من اللي قبل هذاك معطين جنه الايسر) وسمعته بعد قبل يتكلم يقول افففففففففف وطلع من افمه دخان شكمان عرفت انه جر الزقارة بشفطه وحده قال: نعم
انا بعد ان جمعت قواي وحطيت السيارة بواحد اسرع للهجه وقلت: ابي شعير وقل بعد مو للبيع زي خويك الاول(ورجل على البنزين ورجل على الكلتش متولم للنحشه)
قال:مثل خويي الاول هذا للتجار الكبار
شفت انه ممكن يتحاور قلت طيب وش ذنب معزى امي ؟
قال: نعم؟
قلت : ايه معزى امي يعني تموت عشانك انت وغيرك ماتبيعون الا للتجار الكبار؟
قال: لااااا يخسي اللي يقول تموت معزى امك
فرحت وقلت: البق الددسن؟
قال: الله يصلحك شف وانا اخوك تمشي سيده من هنا الين يجيك على يدك اليمين ماقف البرسيم(قصدة مكان بيع البرسيم)وقبل البرسيم لف يسار تلقى حوش كبير فيه تريلات كثيرات يبعون شعير للي يبون خمسين واقل وبسعر التسعيرة (40) ريال
كان ودي انزل واحبه بس قلت لولدي انزل امطخ خشمه

ومشيت بل عدوت بل تجاوزت السرعة القاننوية فرحا بالخبر السار وهو ان (كلشن لش) كما تقول امي الله يشفيها
كلشن لش
اي انه لكل شيء شيء خاص به
والله رايق صح؟؟

المهم ذهبت اولا للبرسيم واخذت خمس اصرار او لبنات من البرسيم بسعر 20 ريال
وانطلقت بخيلاء الى حيث اجتماع سيارات الشعير الخاصة بالمساكين امثال امي ومعزاتها

على البعد ارى زحمة سيارات.....لابأس
على القرب وقبل الدخول الى الحوش رأيت مايلي:
جيب شرطه يتعارك مع احد الرجال واليد باليد ثم رحل الجيب ومن بداخله
ورأيت اكثر من عشرين ددسن محمله بالشعير(وهذه دلالة جيده)
دخلت للحوش ووجدت مايلي:
تريلتين اقصد شاحنتين ... هيكل عظمي
نعم هيكل عظمي حديد في حديد
وحول هاتين الشاحنتين جمع غفير من مشجعي المعزات اقصد ... ما ادري
شجار عالي اقصد شجار يعني اصوات مرتفعه
يمين هنا وهناك اقصد حلف يمين من ذا وذا
لم افهم شيء
اقتربت
ترجلت من على الماي باخ وقلت السلام علاكم وين الشعير
التفت واحد وقال حسبي الله عليهم وزعوه
لم افهم قلت وشلون وزعوه
تركني وراح يكمل شجاره وسمعت مايلي:
والله ان راعي التريلة حرامي
والله انه يعطيه لمعارفه بالتسعيره وعانهم يبيعونه برا بستين
والله انا انا مشتري منهم بخمس وخمسين

هذا حديث احدهم
قالت ياجماعة معزى امي تبي شعير
قال هاك الشايب ومعزى ابوي افطست امس
قال ياوليدي رح مر الخبازين تلقى عندهم خبز يابس اشتره ان لقيته وعوض معزى امك الين ما يفرجها ربي

قلت: لاياعم بس الشعير برا موجود والتسعيرة على الكيس مكتوب (تسعيرة المستهلك 40 ريال)

قال ياوليدي ان لقيته بخمسين برا اشتره
وان لقيته بخمس وخمسين اشتره

ما ادري
ما ادري
ماااااااااااااااا ادري

المهم طلعت بسيارتي الفياقرا
رحت للدادسن اللي برا
قالت :السلام
للاسف : لاجواب
قالت للبيع؟
رد: كم تبي
قلت خمس
قال بثنين وستين
قلت : التسعيرة اربعين
قال : رح ادخل وداحم وعارك وهاوش واشتره ان بغيت ببلاش وتعال لي اشريه منك بستين ريال
قلت : طيب نزل شوي
قال: دور غيري


رحت لغيرة
على كم؟
قال: ستين


رحت لغيره
وكانوا شابين من صغار السن اعمارهم لم تصل للعشرين
على كم؟
55
بسرعة حملوا لي عشرة اكياس
وحملوا لي عشرة اكياس ومن الفرحة عطيتهم بخشيش كل واحد عشرة ريال
التسعيرة اربعين
اشتريت عشرة
مفروض ادفع 400
دفعت 550
انا اقدر
انا استطيع
ولاجل معزات امي الحبيبات افعل ذلك


ولكن غيري...لايستطيع
غيري لايجد مايطعم به ابناءه فكيف يطعم معزاته
اها صح
غيري كما قال ذاك الاول
تفطس معزاته كمعزات جده

والسبب
ان المسرح بلا جمهور
وان الانوار كانت جدا خافته
والسبب ان حماية المستهلك لم تلعب في هذه المسرحية دور البطولة






معزاتي الحبيبات ابشرن فقد اتيت لكن بمفطح شعير
وبوفيه برسيم
لكن عذرا فحماية المستهلك تمنع المقبلات في فصل الصيف



معزاتي الحبيبات الوعد الصفاة

فبيعكن افضل من (فطسكن)





واسدل الستار
بلا تصفيق
وبلا جمهور
بل بل مقاعد
واسدل الستار
ولم ولن تنتهي المسرحية ابدا
في ظل....
غياب الكل ... عن الكل




لاتنسوا دعواتكم لامي[/align]

[عذبة الروح]

الله يشفي والدتك مما اصابها أنه قادر على ذلك وهو السميع العليم ...

اللهم أشفها وعافها شفاء لايغادر سقما اللهم لاشفاء الا شفاءك ...

أنت القادر ولا قادر سواك أن تبعد عنها ما أصابها من ألم وأن تجعل ذلك في موازين حسنانها

ياارب ...


أخي / بوح مساء الخير

هي المره الاولى التي اشارك فيها هنا , ولن تكون الاخيره وكنت متابعة لهذا الجمال بصمت ..

المسرحيه رائعة جداً جداً ..

بورك فيك وفي قلمك وابداعك وهنيئاً لعاصمة الربيع بهذه الحصريه ..

سأكون ضيفة خفيفة هذا اليوم ..

تقبل مروري وسأعود في المرات القادمة مثل هذا المتصفح يجب أن أكون بقربة

لما فيه من إبداع و جمال .. تحياتي ,,

[همسة]

[align=center]

السلام عليكم ورحمة الله وبركاته

لا بأس للوالدة أخوي الفاضل بوح

أسأل الله العظيم رب العرش العظيم أن يشفيها هي والوالد ويعظم لهم أجر صبرهم على تعبهم,,

يؤلمني كثيرا تعب الآباء , ربي يصبرهم ويعافيهم ,,

لهم دعاء بظهر الغيب مني إن شاء الله,,

ولعودة أخرى هنا بحول الله,, ولا أنسى شكري لك لهذه المشاعر الطيبة التي تحفني بها دائما
وهذا من طيبك وأصالة معدنك,, الله يحفظ والديك الكرام ويقر عينك بشفائهم,,

ودي واحترامي
همسة[/align]