يازمن يكفي من الغربه كفا
*******طالت الغربه وانا مليتها
غربة البردان لو فيها دفـــــــــــا
*******ماتساوي دمعة(ن) هليتها
يازمن فيك التلاقي والجفا
*******ونه بقلب الشقا ونيتها
مالقيت بغربتي بلسم شفا
*******تجرح جروحي ولا داويتها
هاج موج(ن) كنت احسب انه غفا
*******شتت افكاري عقب لميتها
هاجس(ن) يرحل وهاجوس(ن) لفا
*******كن قلبي يازماني بيتها
وردة الغربه لها وجه وقفا
******* فاحت الأزهار ماشــميتها
يازمن فيك الخيانه والوفا
******* لوعيون الحي تبكي ميتها
واسفا لحالي نعم لا واسفا
*******اســمها الغربه وانا ســميتها
للشاعر/ بدر بن مزن المطيري