اولا كل عام والجميع بخير.......
ثانيا استغربت من الموضوع على اي اساس اصوت للحفر كافضل مدينه ليش انا ما اخاف الله !!
ومع اني ما اطلعت على جميع الردود الا ان اللي اشوفه ان الحماس شغال وحلو يكون عندنا حماس لمدينتنا بس اللي مو حلو مره ان الحفر تفوز وكأنها مدينه بلا مشاكل وبلا تسيب وبلا استغلال وهالشكل نقول للعالم والله حنا مبسوطين بديرتنا وتراها على مايرام وما عندنا مشاكل ولله الحمد!!
افضل مدينه هي المدينه اللي أهلها يهتمون فيها مو بعض اهلها يستغلونها!
افضل مدينه هي اللي شوارعها عدله مو متكسره من زمن جدي!
افضل مدينه هي اللي توفر فيها كل الخدمات الضروريه !
افضل مدينه هي اللي مناظرها تفتح النفس وواجهاتها تفتح النفس مو وردتين مزروعات على طريق اي امير لاحضر!
افضل مدينه هي اللي فيها متنزهات ومرافق عامه ونوادي ادبيه وتكون رمز للتطور مو خراباتها في كل ركن ووادي!
افضل مدينه مو الواسطه لاعبه فيها لعب واهلها مابين عاطل ومستغل!
افضل مدينه هي المدينه النزيهه اللي ماتغبن أهلها ولا يحسون فيها بالقهر!
افضل مدينه هي اللي محافظها عنده أمانه مو ضيف شرف!
افضل مدينه هي اللي تكون رمز لكل شي عدل للأمانه للعداله للتسامح للجمال مو للفوضى والتسيب والاهمال والغش والمناظر القبيحه!
اييييه ياهل الحفر والله وخليتوها فزعه مثل شاعر المليون !!
بصراحه مدري شلون تفكرون ومدري هالمسابقه منو حاطها وعلى اي اساس بس اللي اعرفه ان محافظ الحفر اذا كانت مسابقه رسميه ومُعترف فيها وفازت الحفر بيجي بكره وضحكته شاقه من الاذن للاذن ويصير رمز للمحافظ الكويس اللي اهل مدينته راضين عنه !
فعلاً مدري شلون تفكرون ؟! بس اللي اعرفه انكم مافكرتم كلش بس السالفه فزعه والسلام انا ما أنكر حبكم للحفر بس اللي استنكره طريقة تعبيركم عن هالحب !!
بالله وبعيد عن المثاليات انتم شايفين اوضاعنا عدله ومدينتنا تستاهل لاتقولون لي الحفر مالها شغل باللي يصير وان التصويت للمدينه كمدينه مو كنظام لانكم راح تثبتون لي ان ماعندكم بعد نظر ولامنطق......ولا تقولون لي اذا فزنا راح احد يلتفت للحفر لانه طريقة تفكير سخيفه!
ثم انه والسلام على من اتبع الهدى .