>>>>>>ماني مصدق إني عديت 14 ساعه وأنا صاحي بدون لا أدخن,,,(يا رب أعني على تركه)
طبعاً بدأت الفكره أو العزم والحماس
الساعه 10.35 صباحاً لما كنت بالدوام وشربت أخر سيجاره وبعدها حسيت إن صدري ما هو بخير أبد,,,وبصراحه من زمان وصدري ما هو طيب..!!
وكرهت نفسي وقلت يا ولد إلى متى وأنت كذا ,,,خليك رجل ولو مره ,,,!!
جيت عند واحد من الزملاء (مطوع) وعطاني دفعه حماسية مره مره قوية من قوتها كسرت العلبة ألي في جيبي..!!
طبعاً طلعت من الدوام ورحت للبيت وضربت ذاك الغدا ألي تحبه قلوبكم,,,وبعدها خذلك نومه مره أليمه ,,,ليش أليمه ..!!
لأني من زمان ما شربت دخان علشان كذا جسمي مره متخدر وراسي أحس إنه صار راس بعير...!!
صحيت من النوم,,, على صلاة المغرب..!!
بعدها رحت للمغسله علشان أجيب ملابسي,,,ورجعت ولبست (البرموده) الرياضي وذيك الفنيله الرياضية الضيقه,,,ويعني مشي مع جري في الحديقه الجديده ألي قدام بيت خالتي,,,
وقفت المشي والجري بعد أذان صلاة العشا بدقايق,,,يعني تقريباً قطعت 4 كليو وزياده,,,في ظرف 45 دقيقه,,,
طبعاً ما حبيت أطول المسافه لأني ما بديت إلا اليوم...!!
(يا رب أعني على تركه)
يعني مشاء الله علي ,,,تركت التدخين ,,,وبديت بالمشي والجري بنفس اليوم ,,,يا هيك الرجال وإلا فلا..!!
المهم نكمل
بعد ما خلصت من المشي والجري دخلت البيت وعلى طول تكرمون الحمام,,,أخذت شور,,,وبعدها لبست الثوب,,,والحمد لله لحقت على أخر ثلاثة ركعات من صلاة العشا,,,بعد ما طلعت من المسجد إلا وواحد من ربعي الخاصين داق علي,,,
مشاري وبداية العصبية
هلا ,,,أبو غازي أخبارك
والله بخير ,,وينك يا مشاري
أنا جاي للإستراحه الجديده ,,,
يالله إلحق علشان اليوم هو دوركم بتنظيف الإستراحه
(على فكره الإستراحه جديده وتونا مستأجرينها وألي خاشين في الإستراحه ذي مره عددهم كثير,,,علشان كذا إنقسموا إلى ثلاث مجموعات,,,وكل يوم مجموعه تنظف ألي تقدر عليه,,,ويا ربي ما جا دور التنظيف حقي إلا لما تركت الدخان,,وش الحظ ذا)
طيب يا أبو غازي أنا جاي تبون شي من البقاله,,,
لا سلامتك
البداية بالعصبية المتوحشه
توني داخل الإستراحه,,,طبعاً الحمد لله أكثر ربعي الخاصين ما يدخنون ,,,بس يشربون شيشه,,,يعني بصراحه أهون شوي,,,وبالنسبة لي أنا أظنها ما راح تخليني أرجع للدخان,,,
لقيت الشباب توهم مولعين الجمر وضابطين ذاك الراس (التفاحتين) طبعاً إشربوا الشيشه قدامي أنا أبعدت عنهم شوي خفت أتهور,,,
بعدها جانا عجاج ,,,وما لقيت نفسي إلا وأنا معهم بالغرفه ,,,والغرفه مره صغيره وصار فيها عجاج من الشيشه,,,راسي وقتها بدأ بالتفاعل ...!!
بصراحه إنهبلت وحسيت إن عزيمتي إضعفت,,,وقال لي واحد من الشله,,
يا مشاري خذلك شفطه من الشيشه,,,
قلت من جدك أنت تبيني أدمر الساعات ألي راحت ..!!
قال يا ولد الحلال كلها شفطه بس علشان تهدي راسك..!!
بصراحه ما قدرت أمسك نفسي,,,أخذت الشيشه وشفطت ذيك الشفطه ,,,ألي خلتني أكح كحه أليمه,,,ذبيت هوز الشيشه على راس خويي,,,وخويي مره مبسوط وقاعد يضحك,,,
>>>>>>يماشي شله غريبه جداً..!!
بيني وبينكم ما نظفت معهم وطلعت من الإستراحه بعد ذيك الشفطه,,وكنت مره معصب وبصراحه من دون سبب أعصب على أتفه الأشياء وكل ما عصبت حسيت إني أشتاق للسيجاره أكثر من أول..!! وقلت يا ولد ما لك إلا الكوفي أشغل نفسك بالإنترنت شوي,,,
مشاري الكوفي
بس قبل ما أروح للنت,,,لازم أشتري فصفص ,,,مريت محلات (باجه) وقلت لو سمحت عطني بـــ 10 ريال (حب قرع مصري من دون ملح) وعلى طول الكيس بالسياره وأفك الكيس ولا وقفت اّكل حتى يوم دخلت النت مليت المخابي منه,,,ومو بس كذا ,,,شريت حق 10 ريال علك إكسترا,,,
وبس وهاذي كل سالفتي من الدوام إلى الحين وأنا أكتب لكم بهذهِ اللحظه
اسال المولى القدير
ان يبعدك عنها وان يبارك لك في عمرك وان يلبسك لباس الصحة والعافيه وان يهديك الى طريق الرشاد
ولكن اخي الغالي
فيه موضوع مهم اخذته في دورة تدريبيه
وذكر قصة والله الى الان اعجبتن
وهو ان فيه شخص اتى الى مكافحة التدخين
المهم جلس الدكتور يتكلم معه نص ساعه عن شر التدخين والخلاص منه
المهم لما انتهى الدكتور وجزم الرجل على الترك
قام الدكتور واخرج زقاره واراد ان يشرب الدخان
قال له الرجل يعني من اليوم وان تتحدث واخرتها انت تشرب
اذا كلامك كله ما اخذت منه واحد بالمئه
تعرف وش رد عليه الدكتور وهو ذكي
قال انت عاطفي وتتاثر بالكلام اللي يجيك وراح ترجع
انا ابغاك من قلبك انت جزمت لايغرك حتى ولو انا شربت مايضرك
لتكن نيتك صادقه وجزمه قويه ولا يؤثر فيك الغير سواء بالكلام او اللمز
مشاري من خلال مواضيعك وردودك في القسم الرياضي عرفت إنك تفقد أعصابك سواء فاز فريقك المُفضل او هُزم كعادته ! ، وتأثر المُدخن بالجو المحيط فيه يُضعف عزيمته تجاه تركه للتدخين . شربت في حياتي نصف زقارة عندما كُنت في خامس إبتدائي ، توقفت عندها ، المجموعة التي أرافقها إلى يومنا هذا وهي تُدخن ، في مرحلة الإبتدائي والمتوسط والثانوي جميع من أسمر معهم يشربون الدُخان ، لم يُدر في خُلدي أني سأشربها مرة ثانية ، أذكر وأنا في أول متوسط طلبوا منّي مجموعة من الشباب أن أشرب سيجارة واحدة فقط مُقابل خمسون ريال ، سكتّ بدون أن أدخل معهم في شد وجذب عرفوا بعدها بأني لا زلت أكثر إصراراً من السابق . وصل بي الأمر أن حلمت يوماً من الأيام بأني شربت سيجارة ، قُمت من النوم فزِعاً ، وحمدت الله أنه مُجرد حُلم . تستهويني رائحة الشيشه وتكاد تأسرني ، لكن معرفتي مُسبقاً بمدى أضرارها يحول بيني وبينها .
سؤال لك يا مشاري : كم مره قررت ترك الُدخان ؟ وماهي أقصى مدة حاولت فيها عدم الإقتراب منه ؟ وإذا كنت سبق أن تركته ورجعت إليه ماهي الأسباب التي جعلتك تعود إليه مرة ثانية ؟ . كل الخوف أن تعود إليه وأخوف ما أخاف عليك أن يكون تركك هذا هو بداية الطريق نحو الشيشه . حاول قدر الإمكان أن تكون المُكسرات مصاحبه لك في كل مكان ، لا تستحي من زملاءك ، إطلب منهم عدم الإكثار من شُرب الدخان والشيشه لحظة وجودك وإذا كان بالإمكان الإمتناع عنه لحظة وجودك معهم فهذا شيء جيد ، مارس الرياضية كثيراً ، تبرع بالدم وجرّب الحجامة أقل القليل أن يظهر النيكوتين من جسمك . تمنيت لو كتبت موضوعك هذا بعد تركك للُدخان بعد سنه أو عدة أشهر ، لكن كتابتك للموضوع في نفس اليوم الذي تركته فيه جعلتني أقول في البداية " أحلق شنبي إذا تركته " .
العرض العادي
